ATOK, BENGUET – Impakaammo ni Councilor Edward Haight ti Atok, Benguet a ti comfort room iti Half Tunnel a masarakan sadiay Km.46, Atok ket saanen a baente kwarto oras a nakalukat.
Iti panakiuman ti Bombo Radyo kenni Haight, kinunana a ti comfort room ket nakalukat laeng iti publiko no aldaw ken maiclose daytoy iti rabii.
Daytoy ket gapu ta naobserbaran a tunggal rabii ket agkaiwara dagiti basura ken saan a nasayaat ti disiplina dagiti agar-aramat.
Kinuna ni Haight, adda met ti personnel a nakadeploy nga agbanbantay tapno mamintinir ti kinadalus kasta met a daytoy met laeng ti mangbalbalakad kadagiti motorista iti saan a basta a panagisbo iti igid ti tourist attraction a Half tunnel.
Impakaawat met ti nasao a councilor a kasapulan ti agbayad iti panagaramat iti comfort room no sadino P5 para iti panagisbo ken P10 para iti panagbawas.
Dagiti makolkolektar iti daytoy ket maar-aramat para iti maintenance daytoy.
Iti agdama, mapangpanggep ti panakapasayaat pay ti comfort room ti Half tunnel ken to nasao a tourist destinations tapno mas bisitain daytoy dagiti bisita.
