Inwaragawag ti Department of Migrant Workers a saan pailaeng a mabalin nga agturong dagiti baro nga Overseas Filipino Workers idiay Iran, Israel, Jordan ken Lebanon gapu iti panagsupiat a mapaspasamak iti nagbaetan ti Israel ken Iran.
Iti inruar nga Advisory No. 19 series 2025 ti Department of Migrant Workers, nakalanad a maiparit ti mangideploy kadagiti OFW iti nasao nga uppat a pagilian.
Mainaig iti daytoy, immunan nga adda ti deployment ban idiay Israel gapu iti panagatake ti Hamas idi Oktubre 2023.
Nagballaag ni Deparment of Migrant Workers Secretary Hans Leo Cacdac kadagiti recruitment agency a saan nga agtulnog iti pammilin.
Immunan a kinuna ni Cacdac nga adda ti 58 a Pilipino nga agturong koma idiay Israel wenno Jordan ngem nastranded dagitoy idiay Dubai ken Abu Dhabi nga iti agdama ket tultulongan ti gobyerno.
Uppat kadagiti Pilipino a paturong koma idiay Israel ti naalaan iti flight tapno makasubli iti Pilipinas.
Iti agdama ket agtaltalinaed ti napudot a tensyon idiay Middle East gapu iti agtultuloy a panagbomba ti Israel ken Iran iti tunggal maysa.
