Imbinglay iti maysa a Pilipino nga agnanaed ita idiay Israel a bumasbassit wenno sagpaminsan laengin nga adda ti maipatpatayab idiay a missiles manipod Iran.
Iti panakiuman iti Bombo Radyo kenni Elena Firestein,Bombo International News Correspondent idiay Tel Aviv, Israel, dumanon laengin iti dua agingga lima a missiles ti mangmangngegda nga agturturong idiay Israel, saan a kas idi Biernes nga adu ti aggigiddan.
Sigun kenni Firestein, naikkat itan ti lockdown iti lugar a pagnanaedanna nu sadino, mabalinen nga agbiahe dagiti bus kasta met a silulukat dagiti paggatangan.
Nupay kasta,kanselado paylaeng ti serrek kadagiti pagadalan.
Innayon ni Firestein nga iti agdama ket kontroladon iti Israel ti tangatang iti Iran gapu ta adda dagiti kameng iti Air Forces a nagturong sadiay.
Mainaig iti dayta,kinuna ni Firestein a natalged latta ti kasasaadda sadiay ken adda dagiti bomb shelter a pagturunganda tunggal adda ti mapasamak a panagatake.
Malaksid iti dayta, adda metlaeng iti ar-aramatenda nga aplikasyon a mangipakpakdaar nu adda iti umasideg a bomba wenno missile.
Iti baet a natalged ti kasasaadda iti agdama, inaklon ni Firestein a dakdakkel ti panagdanagna iti panakigubat iti Israel iti Iran ngem iti panakigubat daytoy iti Gaza ken Lebanon gapu ta sigun kenkuana, napigpigsa ken nakarkaro ti madadael dagiti ballistic missiles nga ipatpatulod iti Iran.//Bombo Rob Dominguez
