Kuston ti maminsan a panagsinnipat dagiti dakulap.
Dayta ti pakaskasdaawan ti maysa nga ina iti sabali a pagilian a nagpagraduar iti kindergarten nga anakna.
Imbes nga ipapasna koma ti agpalakpak kas panangipeksa iti panangipannakkel ken ragsak gapu iti panaggraduar iti anakna, arigna napurnada.
No apay? Dayta ket gapu iti polisiya iti pagadalan a maysa laeng tunggal estudyante ti maidaton a palakpak bayat nga umuli dagitoy iti entablado tapno awaten ti diplomada.
Kas iti ina a nangipablaak iti video ti graduation ceremony, adu metlaeng a netizen ti nasdaaw ken naburburchaan nu sadino, inladawan pay ti maysa a nagkomento a maiyarig daytoy iti kulto.
Iti baet iti pammabalaw, adda dagiti nangibaga a nalabit ket maysa daytoy nga estratehiya tapno maliklikan ti posible a panakarikna iti panakaibabain ken panakapaay dagiti estudyante nga awanan kadagiti kapamilya a dumar-ay ken mangpalakpak kadakuada.
Nupay kasta, agtaltalinaed a saludsod nu epektibo ti “one-clap rule” gaputa daytoy ket saan a kadawyan a mapaspasamak.
