Agrekreklamo ti maysa a taxi driver kalpasan a naipaayan ti citation ticket bayat a nailet ti gunay ti trapiko iti oras ti alas siete ti agsapa idi kalman.
Iti panagturong iti istasyon ti Bombo Radyo ni Roneth A. Calibuso, kinunana a nakursunadaan daytoy ti nakaduty a pulis nga ipaayan ti citation ticket nga awan met ti nilabsingna a linteg trapiko.
Sigun kenni Calibuso, pakillo (crossing) daytoy iti Dominican Hill manipod iti Quezon Hill Road idi kellaat nga ayaban daytoy ti maysa a pulis nga on-duty.
Dinamag ni Calibuso nu ania ti nilabsingna a linteg trapiko ket sinungbatan ti pulis nga “obstruction.”
Para kenni Calibuso, saannna a nalabsing daytoy gaputa “heavy traffic” iti nasao nga oras.
Kabayatanna, nadlaw ti drayber ken ti pasaherona a saan a nasayaat ti galad ti pulis idi nagdamag ti drayber ken naimatangan nga agngalngalngal daytoy ti “momma.”
