Kidkiddawen ni Benguet Congressman-elect Eric Go Yap iti publiko nga isardengdan nga agsisinnungbat iti social media seknan iti isyu daytoy nga adda pakainaiganna iti May 2025 elections.
Daytoy ket kalpasan nga iproklama ti Provincial Board of Canvasser ni Yap kas duly elected member ti House of Representatives para iti Lone District ti Benguet manipud 2025 agingga 2028.
Kiniddaw pay ti nasao a kongresista nga agsardeng dagiti amin a mangkonkontra kenkuana ken agtinnulong ketdi dagitoy para iti pagsayaatan ti probinsiya ti Benguet.
Nagyaman met daytoy kadagiti suporta a naawatna ken impeksana a naragsakan daytoy agsipud ta nalpasen dagiti kaso a naipila kontra kenkuana.
Impasiguradona met nga agtultuloy ti serbisyo ti district office daytoy iti baet a naisubli dagiti pundo a naipaay kenkuana gapu iti pannakaitantan ti proklamasyon daytoy.
Nupay kasta, kinunana nga ituloyna ti trabahona tapno makaala manen iti pundo para iti probinsya ti Benguet.
