Impaganetget ti presidente ti Brazil a kasapulan nga aggaraw ti sangalubungan tapno lapdan ti mapapati a “genocide” ti Israel idiay Gaza, bayat a nagtaripnong dagiti lider manipod iti 11 a pagilian a karaman iti BRICS idiay Rio de Janeiro idi napalabas a lawas.
Sigun kenni Luiz Inacio Lula da Silva iti sanguanan dagiti lider manipod iti China, India ken dadduma pay a pagilian, saan a mabalin nga agtalinaed nga awan ti pannakibiang iti mapapati a genocide nga ar-aramiden ti Israel idiay Gaza— nu sadinno awan ti pilpillienna a panangpapatay kadagiti inosente a sibilyan, ken ken panangusar iti bisin kas igam ti gubat.
Impakaamo ni Lula ti komentona bayat a nangrugi manen ti maipapan ti ceasefire idiay Doha iti nagbaetan ti Israel ken Hamas, iti tengnga ti pumigpigsa a kiddaw a panagpatingga iti 22 a bulan a giera a nangrugi kalpasan ti panagatake ti Hamas idi Oktubre 7, 2023.
Sigun kenni Lula, awan ti aniaman karbaengan dagiti terorista a Hamas iti nasao nga aldaw- a nagresulta iti ipupusay ti 1,219 nga indibidual, a kaaduan ket dagiti sibilian nga Israeli.
Nupay kasta, kinondenarna metlaeng dagiti simmaruno a wagas ti Israel.
Karaman iti naisayangkat a panagtaripnong ti BRICS dagiti pagilian a kas ti Iran, a pagaamo a kabusor ti Israel, ken ti Russia nga addaan iti nasinged a singgalut iti Israel.
