Dumanon iti tallo a pamilya a pakabukalan iti 16 nga indibidual ti naapektaran iti panagreggaay ti daga sadiay Purok 6, Irisan, Baguio City.
Iti panakiuman ti Bombo Radyo kenni Rene Cadag, maysa kadagiti naapektaran iti landslide, kinunana a narugian ti panagreggaay ti daga iti masakupanda idi July 2 agingga a natuluyan ti panagreggaay daytoy iti kabigatanna idi July 03,2025.
Gapu iti dayta, nagturongda iti Brgy. Hall ti Irisan tapno agkiddaw iti tulong rason a naipabulod kadakuada dagiti sumagmamano a tulda.
Nupay kasta, saan nga umdas ti naipaay kadakuada a tulda agsipudta naibusanen ti barangay ngem babaen iti tulong ti kabagyanda ket naipaay met ti umdas a suplay ti tulda a pangsarapa iti panagreggaay ti daga.
Innayon met ti kabsat daytoy a ni Jonathan Cadag a pansamantala paylaeng ti solusyon nga impatungpal dagitoy ken mangnamnamada iti tulong a pinansyal manipud iti DSWD nga isu ti aramatenda nga aggatang iti tulda wenno sako tapno adda ti pangkabite-da iti nargaay a paset ti lote dagitoy.
Innayonna a kalpasan ti panangipatulod ti kabsat daytoy iti mensahe iti Mayor’s Office ket adda met dagiti kameng ti CDRRMO, BCPO-PS9, ken dagiti barangay officials a nagturong iti pagtaengan dagitoy tapno i”assess ” ti sitwasyon dagitoy iti nasao a lugar.
Kinuna pay ni Cadag a maurnong ti danom nga agtaud sadiay Naguilian Road ken sumalog paturong iti asideg ti pagtaenganda ken iti masakupanda a lote.
Gapu iti dayta, kidkiddawenda kadagiti maseknan nga opisyal ken opisina ti pannakailukat ti maysa a drainage sadiay Brgy. Irisan tapno saan a nga iti abay ti pagtaengan dagitoy ti pagnaan laeng ti danom.
