Agtultuloy ti panangipatungpal nga imbestigasion ken “verification” ti PNP seknan iti posiblidad a saan laeng nga idiay Taal Lake ti posible a nangibellengan ken nangitabunanda kadagiti bangkay ti nasurok 100 a mapukpukaw a mammallot.
Sigun kenni PNP Chief PGen. Nicolas Torre III, naipasidongen iti verification ti impormasion nga adda dagiti sumagmamano a nauram a mammallot bayat a dagiti dadduma met ket mapapati a naitabon iti daga.
Sigun pay kenni Torre, saan laeng a ti Taal Lake ti naaramat a disposal site para kadagiti bangkay dagiti mammallot nu diket adda dagiti partikular a lugar a manarimaan a suksukimatenda a posible a nangikabilanda kadagiti dadduma a mammalot.
Nagkedked met ti hepe a dakamaten dagiti lugar a berberipikarenda.
Dakkel ti posibilidad nga adda dagiti personalidad a maapektaran iti ar-aramidenda nga imbestigasion nga agbalin a rason tapno malapdan ti panagurnongda iti impormasion ken imbestigasion.
Inaklon ti hepe a narigat ti panangsapulda kadagiti bangkay dagiti mammallot ken inkarina nga ar-aramiden ti PNP ti kabaelanda tapno masigurado a matiliw iti adda iti likudan ti nasao a krimen.//Bombo Benjo Guzman
