Maaw-awagan ti imatang dagiti maseknan nga opisina kas iti barangay, Benguet Electric Cooperative ken City Environment and Parks Management Office maipapan ti pakaseknan dagiti sumagmamano a residente sadiay Purok Pidawan, Loakan Proper, Baguio City gapu iti nagango a puon ti pine tree sadiay.
Iti panakiuman ti Bombo Radyo kenni Elly, maysa kadagiti agindeg sadiay, nabayagen a parikutda daytoy.
Sigun kenkuana agarup pito a tawen a nagango ti nasao a pine tree ngem kadagiti napalpalabas a tawen awan met ti nakitkita dagitoy a problema ngem ita laeng a nangrugi a nagtennag dagiti sangsanga dagitoy.
Impeksa ni Elly a saan laeng a gagangay a sanga nu diket medyo dadakkel a sanga dagiti naregreg.
Iti baet dayta, ket awan met ti nadangran ngem narisgo latta daytoy gaputa mismo a malablabasan ti sirok daytoy.
Mainaig iti dayta, sigun met iti maysa kadagiti residente sadiay, namin-adu da daytoyen a nai-uman iti barangay ngem saan daytoy a na-ak-aksyonan.
Kinunana nga adda met a nagbisita ti kapitan kaduana dagiti dadduma pay nga opisyal ngem saandan a nagsubli manen dagitoy.
Imbinglayna pay a private property ti paset ti nakaimulaan ti nasao a pine tree rason a saan dagitoy a kas karina a putuden.
Kabayatanna, kinuna dagiti brgy. officials a naipadamag kadakuada ti nasao nga issue ngem ti kapitan laeng ti akin-ammu nu kasanu ti development ti nasao nga issue.
Naipadamag kadakuada rason a naiuman metten daytoy iti BENECO ngem saan a kabaelan ti boomtruck nga abuten ti nasao a kayo.//Bombo Noveh Organo
