Naiturong dagiti agarup lima nga indibidual pakairamanan dagiti dua nga ubbing iti ospital kalpasan a nadungpar dagitoy ti maysa a van sadiay Cypress, Irisan, Baguio City ita a rabii.
Sigun iti maysa a residente, nagparada ti driver iti salugan iti igid ti kalsada tapno gumatang laeng iti sidaen dagitoy.
Nupay kasta, kellaat a nagandar ti nasao a van rason a nadungparna dagiti agarup lima nga indibidual a magmagna iti nasao a kalsada.
Sigun iti pannakiuman ti Bombo Radyo kadagiti umili sadiay mapapati a nakatalikod a magmagna dagiti biktima rason a saanda a nakita ti nasao a lugan.
Naamuan met nga in-handbreak ti driver ti lugan ken ineddepna ngem saan a naikambyo daytoy wenno naisecure.
Pinadas met ti driver a kamaten ti nasao a lugan ngem saannan a nabaelan daytoy.
Gapu iti dayta, naidungpar ti nasao a lugan iti poste ti kuryente.
Kabayatanna, naiturong metten ti driver ti nasao a lugan iti Baguio City Police Office, Police Station 9 para iti kanayonan nga imbestigasyon.//Rose via Noveh
