Maim-imbestigaran pailaeng ti insidente ti bullying a napasamak idiay Poblacion, Tuba, Benguet a nakairamanan dagiti estudyante itay laeng nabiit.
Iti interview ti Bombo Radyo, kinuna ni Estela Leon-Cariño, Regional Director ti Department of Education-Cordillera nga adda ti Gender Responsive and Non-Discriminatory Student Discipline (GRaNdSDism) Manual kadagiti pagadalan a mangipaay iti umno a pannusa kadagiti estudyante a nangbully wenno nangdangran kadagiti padada nga estudyante.
Dinakamat ni Cariño a nu malpas ti imbestigasyon ket adda dagiti sumagmamano nga interventions para kadagiti estudyante tapno maipaayanda iti gundaway a mangpanunot kadagiti saan a nasayaat nga inaramid dagitoy.
Sigun iti nasao nga opisyal, nakikoordinaren ti DepEd iti Philippine National Police, Department of Social Welfare and Development ken kadagiti maseknan a nagannak.
Inyunay-unayna a saanda a baybay-an ti insidente ti bullying iti uneg ti pagadalan.
Kidkiddawenna met ti tulong dagiti umili tapno maisardengen ti bullying iti uneg ken ruar ti pagadalan.
Maipalagip nga idi Hulyo 8 ket naalaan iti video ti grupo dagiti estudyante a nangbugbog iti maysa a grade 8 student iti igid ti kalsada idiay Poblacion, Tuba, Benguet.
Babaen iti maysa a taxi driver ket naanawa ti panangdangdangran dagiti innem nga agtutubo iti grade 8 student ken impeksana a nakasagana daytoy a tumulong tapno maipaayan iti umno nga aksyon ti nasao nga insidente.
