Napasamak ti nakalkaldaang nga aksidente ti lugan sadiay Aurora, Isabela a nakairamanan ti dua a van nga agturong iti Tabuk City, Kalinga manipud Baguio City, ken maysa nga elf truck.
Iti pannakiuman ti Bombo Radyo, PCapt. Terrence Tomas, pannakangiwat ti Isabela Police Provincial Office, kinunana a maibasar iti inisial nga imbestigasion, agturong iti Santiago City ti truck idinto nga agsumbangir ti direksion dagiti dua a van.
Mapapati nga inagaw ti trak ti linya a gapuanan ti pannakadungparna iti umuna a van a nagluganan ti 16 a pasahero sakbay a naidungpar iti simmaruno a van a naglugan ti 9 nga indibidual.
Walo nga indibidual iti maikadua a van ti nailista a pimmusay pakairamanan ti drayber.
Dua met ti nagsagrap ti nakaro a pannakadangran iti umuna a van ken agtultuloy ti obserbasyon dagiti dadduma iti pag-agasan.
Iti walo a naipadamag a pimmusay, uppat kadagitoy ti napanaganan bayat nga agtultuloy a dukduktalen dagiti otoridad ti pakabigbigan dagiti uppat.
Sigun kenni PCapt. Tomas, human error ti makitkita a rason ti insidente.
Iti agdama, adda iti kostodiya ti Aurora Police Station ti truck para iti kanayunan nga imbestigasion ken disposision.
Kabayatanna, imbinglay ti maysa a pasahero ti van iti Bombo Radyo a ni Jers Sabado ti kapadasanna iti napasamak nga insidente.
Sigun kenni Sabado, natugaw isuna iti tengnga a paset ti van isut gapuna a minor injuries laeng ti nasagrapna. Maysa kadagiti kaduana iti kritikal ti kasasaadna.
Kaaduan kadagiti naglugan iti van ket manipod iti Tabuk City, Kalinga ken nagbiahe manipod iti siudad ti Baguio idi kalman ti rabii.
Saan met a maamuan ni Sabado nu siasino ti nagbasol iti insidente gaputa nakaturog daytoy idi napasamak ti panagbinangga.
Numan pay nakaro ti trauma a napasaranna, agyamyaman latta daytoy a saan a nakaro ti sugatna.
Sigun kenni Sabado, saanna pay a pampanunuten ti panangipila ti reklamo ken kayatna pay nga ipaayan ti oras ti panagimbagna manipod iti sugat a napasaranna.
