Natalged ita ti intero a munisipyo ti Sablan, Benguet iti baet ti epekto ti bagyo a Crising.
Iti panakiuman ti Bombo Radyo kenni Galo Santa, Local Disaster Risk Reduction and Management Office ti Sablan, Benguet, kinunana nga adda ti maysa a pamilya nagbakwit iti evacuation center sadiay ngem nagsubli dagitoyen iti pagtaenganda.
Iti baet dayta, nainget latta ti monitoring dagitoy iti amin a paset ti nasao a munisipyo tapno mapagtalinaed ti seguridad dagiti umili.
Sigun kenkuana, adda dagiti radyo a maar-aramat a pang-contact-da kadagiti adayo a lugar sadiay iti kanito nga awan ti signal dagiti mobile phones.
Kanayon metlaeng a makikikoordinar dagitoy iti tumunggal barangay rason a maipakpakaammo a dagus ti sitwasyon kadagiti lugar dagitoy.
Kinunana nga amin a barangay ket adda iti natalged a kasasaad babaen iti panakitinnulong dagiti umili kadakuada.
Impeksana pay a nakapreposition dagiti food ken non-food items a maipaay kadagiti agkasapulan iti tulong.
Malaksid iti dayta, nakasagana metlaeng dagiti evacuation centers ken equipments a maaramat iti kanito a kasapulan dagitoy.
Nupay kasta, agtultuloy latta a bambantayanda ti sinking area iti barangay Banangan ken kadagiti dadduma pay a lugar.
Kagiddan dayta, nagpalagip daytoy kadagiti umili nga agridam ken liklikan nga agturong kadagiti taltalon wenno uma dagitoy no saan a nasaayat ti sasaaden ti panawen.
