Idagdagadag ni Bicol Saro party-list Rep. Terry Ridon, chair ti House Committee on Public Accounts, a rumbeng a maibutaktak ti nagan dagiti sumagmamano a maatap a House members a karaman iti kurapsyon kadagiti government infrastructure projects.
Daytoy ket kasaruno ti impetteng ni Sen. Panfilo “Ping” Lacson nga agarup 67 a House members ti contractors metlaeng kadagiti government-funded infrastructure projects.
Immunan metlaeng nga inakusaran ni Baguio City Mayor Benjamin Magalong, a sumagmamano kadagiti mammanday-linteg ti agal-ala iti 30% agingga 40% iti budget para iti flood control ken infrastructure projects.
Gapu iti dayta, kinuna ni Ridon a ti napateg ket mainaganan dagiti pudpudno a karaman iti daytoy.
Malaksid iti dayta, namnamaenna metlaeng iti inventory a mainayon dagiti proyekto a naileppas a kas metlaeng iti impetteng ni President Ferdinand Marcos Jr. iti maikapat nga State of the Nation Addressna itay nabiit.
