Nakemmeg ti dua nga indibidual babaen ti Kalinga Provincial Cyber Response Team ken Ifugao Provincial Cyber Response Team gapu iti iligal a panangilakida iti e-wallet account.
Dagiti suspek ket babai nga alyas “Rita,” agtawen ti 25 ken alyas “Rica” nga agtawen ti 29 a nakemmeg iti Tabuk City ken siudad ti Baguio.
Sumangsango ti dua a suspek iti kaso a panaglabsing iti Section 5(d) ti RA No. 12010 (Anti-Financial Account Scamming Act or AFASA of 2024) ken Section 7 ti RA No. 11934 (SIM Registration Act of 2022), nga adda pakainaiganna iti Section 6 ti No. 10175 (Cybercrime Prevention Act of 2012).
Kabayatanna, nagpalagip met ni Anti-Cybercrime Group Acting Director Brigadier General Bernard R. Yang a liklikan a mairaman iti panangilako wenno panaggatang ti e-wallet wenno bank accounts online gaputa nainget a maipawil iti sidong ti linteg.
