Naisardeng ti search and retrieval ti siudad ti Baguio iti mapukpukaw a 35-anyos a lalaki a mannalon a naiyanod kalpasan a nagaburan iti landslide kabayatan ti panagwidna manipud iti garden dagitoy sadiay Purok 5, Kias, Baguio City.
Maipalagip a nakumpirmar a mapukpukaw daytoy bayat ti panagdalapos ti typhoon emong.
Iti panakiuman ti Bombo Radyo kenni Juluis Santos City Disaster Risk Reduction and Management Office, Baguio City (CDRRMO) operations office, kinunana a naisayangkat ti maudi a gundaway a search and rescue idi kalman.
Ditoy met a nabukel ti tallo a team manipud ti City Disaster Risk Reduction and Management Office, Tactical Operations Group 1, Kias Barangay DRRM Committee, Local Miners, Kias Barangay constituents, Baguio City Police, Disaster Risk Reduction and Management, City Mobile Force Company, ken dagiti local volunteers.
Naideploy dagitoy iti tallo a site iti Kennon Road sadiay Camp 1, 2 ken Camp 3 awan ladta ti nasapulan dagitoy.
Impetteng ni Santos, a nu man pay naisardeng ti search and rescue operation dagitoy ngem agtultuloy ti coordination dagitoy kadagiti kabangibang a lugar gapu ta ti destinasyon a pangsapulandan ti bagi ti mapukpukaw ket iti paset ti munispyo ti Tuba, Benguet.
Impeksa ni Santos nga iti baet ti panagregget ken tarigagayda a masapulan ti biktima namin-adu dagitoyen a sinublian dagiti amin a possible a nakayanudan ti biktima ti masakupan dagitoy ngem negative ladta daytoy.
Kabayatanna, imbinglay ni Santos a ti karit a sinango dagitoy ket ti kinapigsa ti ayos ti danum kasta metlaengen a sumagmamano kadagiti pagsapsapulan da ket nauuneg.
Nupay kasta, mangnamnama dagitoy a masapulan pay ti biktima.
Imbinglay ni Santos nga adda ti naawat dagitoy manipud sadiay San Fabian, Pangasinan ken sadiay Dagupan a tumtumpaw a bagi ti maysa a tao ngem naduktalan a daytoy ket saan nga isu ti sapsapulenda.
Mainaig ti dayta mangnamnama metlang ti pamilya ti biktima a masapulan daytoy.
Kagiddan dayta, kinomendaran ni Santos dagiti amin nga ahensya ken dagiti amin a timmulong iti nasao nga operasyon sipud iti umuna nga aldaw.//Bombo Noveh Organo
