Nakaruaren manipod iti ospital dagiti tallo nga indibidual a nadangran iti napasamak a karambola dagiti lugan idiay KM4, La Trinidad,Benguet itay laeng nabiit.
Maysa laeng kadagiti nadangran iti agtaltalinaed iti pagagasan agingga iti agdama kalpasan iti panakaipakpak ti ulona gapu iti nasao nga insidente.
Iti panakiuman iti Bombo Radyo kenni Police Captain Mark Organo Botangen, Traffic Officer ti La Trinidad, dumanon ti pito a lugan ti nairaman iti nasao a vehicular traffic accident a buklen iti 2 a motorsiklo, 1 a jeep ken 4 nga sports utility vehicle.
Iti inisyal nga imbestigasyon iti kapulisan,rumrumwar a loose brake ti rason iti aksidente.
Sigun kenni Botangen, imbinglay kadakuada ti driver ti jeep nga adda paylaeng daytoy iti batog ti maysa nga hotel sadiay Magsaysay idi nariknana a saanen a nasayaat ti kondisyon ti lugan nga imanmanehona.
Nupay kasta, intultuloyna ti nagbiahe bayat a pinanunotna nu anya ti umno nga ikastana.
Iti baet dayta, kinuna ni Botangen nga inaklon iti jeep driver a daytoy ti rason iti nasao karambola.
Kabayatanna, immangugot met iti amicable settlemment dagiti daduma a nairaman iti nasao nga aksidente bayat a ti jeep driver iti mangibaklay amin kadagiti magastos para iti panakatarimaan dagiti nairaman a lugan ken ti pinagpataming dagiti nadangran.//Bombo Noveh Organo
