Naipila ti maysa nga ordinansa nga insurat ni Baguio City Councilor Edison Bilog nga addaan panggep a maipawil ti panagilako, panangiwaras, panagtagikua, ken panagaramat ti sigarilio a maaw-awagan ti “tuklaw” tapno masalakniban ti salun-at ti publiko, maitandudo ti kinatalged ti publiko ken pannakasalaknib dagiti agtutubo manipod iti peggad daytoy.
Maisingsingasing a nainget ti pannakaipawil ti tuklaw ken ti kapada a sigarilio iti intero a siudad. Ti “tuklaw” a sigarilio ket maysa a tabacco product a mapapati a naglaon ti “hallucinogenic substances.”
Sigun kenkuana, ti tuklaw ken dadduma pay a sigarilio ket maipadpadamag a maiwarwaras kadagiti merkado, side street, ken uray kadagiti asideg nga eskuelaan, a masansan a puntiria dagiti nakurapay nga indibidual ken dagiti agtutubo.
Dagiti aglabsing ket sumango iti multa a dumanon iti P3,000 ken makumpiskar ti sigarilio para iti umuna a panaglabsing; P5,000.00 a multa ken pannakaibalud ti 30 nga aldaw; ken ti maikatlo ket sumarsaruno pay a panaglabsing ket mamulta ti P5,000, pannakaibalud ti 30 aginga 60 nga aldaw, ken ti pannakakanselar ti business permits.
Ti Baguio City Police Office ti agserbi kas primary enforcement body babaen ti pannakitinnulongda iti City Health Services Office (CHSO), Public Order and Safety Division (POSD), barangay officials, ken dadduma pay nga ahensia.
Maipalubos ti surprise inspections, sting operations, ken regular a panangmonitor tapno malapdan ti ad-adda pay a panagadu dagiti nagduduma a kita ti sigarilio.
