Maisaksakad iti Baguio City Council ti ordinansa a mangibangon iti LGBTQIA+ Official-for-a-Day Program tunggal Pride Month tapno maipaayan iti gundaway dagiti kameng iti LGBTQIA+ community a mapadasan ti panangidaulo ken agaramid iti polisia iti lokal a gobierno.
Iti sidong iti singasing, mapili dagiti makipaset a temporario nga agserbi kadagiti pagrebbengan dagiti opisial iti siudad a kas iti mayor, vice mayor, councilors, ken dagiti dadaulo iti opisina iti uneg iti maysa nga aldaw.
Panggep iti programa a maital-o ti inclusivity, patas, ken aktibo a pannakipaset iti LGBTQIA+ community iti gobierno, kasta metlaeng ti panangpalawa iti pannakaamo iti lokal a panangidaulo ken serbisio publiko.
Kwalipikado dagiti aplikante nga agtawen iti 18 agpangato, residente iti siudad iti uneg iti saan a bummaba iti maysa a tawen, ken adda ti nasayaat a reputasyon ken aktibo a partisipasyon iti komunidad ken adbokasia.
Naaprobaranen daytoy iti umuna a pannakaibasana ngem ad-adalen paylaeng ti maseknan a komite.
