Impetteng ni Senator Panfilo Lacson a ti rason iti panakaikkat ni Philippine National Police (PNP) chief Police General Nicolas Torre III iti takemna ket gapu iti nalabes a panagtignay wenno panagaramatna iti authority daytoy.
Inlawlawagni Lacson a ti panakasukat wenno panakabalbaliw iti takem kadagiti miembro ti PNP command group-pakairamanan ti Deputy for Administration, Deputy for Operations, ken Chief, Directorial Staff ket nasken nga aprobaran pay daytoy ti Presidente.
Kinunana pay a rumbeng a maikoordinar daytoy iti ex officio chairman ti National Police Commission ken iti Secretary of the Interior and Local Government.
Impettengna a bayat ti panagtugawna iti nasao a takem ket saan a naglabes daytoy iti authority seknan iti panakaidesignar kadagiti miembro ti Command Group.
Nupay kasta, kinunana a ti napateg iti daytoy ket nasayaat ti transition ken panakaiyakar ti command ken authority tapno saan a maapektar ti mission dagiti pulis iti panangpatalinaed iti linak ken kappia.
