Baguio City- Pagsagsaganaan ita ti Baguio Central University ti panaghost iti maika tallo pulo ket innem nga edisyon ti Baguio Benguet Educational Athletic League wenno BBEAL nga agrugi intun Oktubre iti agdama a tawen.
Ti BBEAL ti kadakkelan a collegiate sports tournament a partisiparan dagiti nagduduma a tertiary wenno unibersidad iti Baguio ken Benguet Province.
Sigun kenni Dr. Perfecto Lopez, Vice President for Academics ti BCU, dumanon iti siyam nga unibersidad manipud iti sangapulo ket maysa a miembro dagitoy ti makipaset iti baro a season.
Dagiti nagkumpirma a pagadalan ket ti University of Baguio Cardinals (UB), University of the Cordilleras Jaguars (UC), Saint Louis University Navigators (SLU), University of the Philippines Baguio Fighting Maroons (UP), Benguet State University Wildcats (BSU), Baguio College of Technology Atoms (BCT), Philippine Military Academy Cavaliers(PMA), Cordillera Career Development College Admirals(CCDC) ken ti host a Baguio Central University Eagles (BCU).
Dagiti dua a member schools a nagbeg off wenno saan a makipaset ita a season ket ti Pines City Colleges ken Kings College of the Philippines.
Innayon pay ni Dr. Lopez a naituding a mangisayangkat da iti taripnong kadagiti mangbukbukel iti Executive Committee tapno pagsaritaan dagiti ay-ayam a maipatungpal iti panaglukat ti baro a season.
Mangnamnama pay ti BBEAL execom a sapay kuma ket makaala da iti suporta iti Philippine Sports Commission wenno PSC tapno naan-anay a mapataray ti nasao a liga.
Ti tema ti panaglukat ti collegiate league ita a tawen ket SOAR HIGH BBEAL.
Maipalagip a nag overall champion ti UB Cardinals iti kallepas a 35th season nu sadino ti nagserbi kas host ti opening ceremonies idi napalabas a tawen ti Philippine Military Academy.
