Nakasaganan ti Float Parade a maipatungpal ita nga aldaw kas paset ti madama a selebrasyon ti maika-11 nga Fruit Festival ti Sablan, Benguet.
Sigun kenni Sablan Mayor Alfredo Dacumos Jr., mangrugi ti parada alas siete y media iti agsapa.
Mangrugi ti parada sadiay Yagyagan, wenno baba ti Lamtang bridge agingga iti Municipal Grounds sadiay Poblacion, Sablan, Benguet.
Dumanon iti walo a float a naaramid ken nadesenyo babaen kadagiti nagduduma a prutas ti makipaset iti nasao nga aktibidad.
Dagitoy ket manipud kadagiti walo a babbarangay a mangbukbukel iti munisipyo ti sablan.
Aw-awisen met ni Mayor Dacumos Jr. ti publiko a makipaset ken agbuya iti nasao a parada.
Maipalagip a nangrugi ti Sablan Fruit Festival idi August19 ken agleppas daytoy inton Huebes, September 4.
Panggep daytoy nga ital-o ti turismo ken agrikultura iti nasao a munisipyo.
Naladaw ti panakaipatungpal ti nasao a pestibidad a nangrugi kuma idi August 1, 2025 gapu iti naglabas a nepnep ken bagyo.
Kalpasan ti Float Parade, maipatungpal met ti Farmers Congress iti Sablan Municipal Gym inton Miyerkules (Sept. 3, 2025), bayat a ti Closing ken awarding kadagiti nangabak ken nskipaset kadagiti nagduduma a kompetisyon ket maipatungpal inton Huebes (Sept. 4, 2024).
Immuna iti daytoy, inaklon ni Mayor Dacumos Jr. nga apektado ken bimmaba ita ti produksiyon ti prutas sadiay Sablan gapu iti naglabas a dakes a sasaaden ti panawen.
Maipalagip pay a dagiti prutas ti kangrunaan nga agricultural products ti Sablan, Benguet.//Bombo Alfred Pudsoc
