Nakipagkita ni President Ferdinand Marcos Jr. kadagiti Pilipino nga adda sadiay Cambodia kagiddan ti tallo nga aldaw nga official state visit daytoy iti nasao a pagilian.
Dumanon iti 440 a miembro iti Filipino community idiay Phnom Penh ti kinasarita ti presidente kas umuna nga agendana.
Kinomendaran ni Marcos Jr. ti panangibagi dagiti Pilipino iti pagilian a Pilipinas iti global scale a makatulong tapno maitandudo ti premium world-class Filipino brand.
Maipalagip nga agarop 10,000 a Pilipino ti adda sadiay Cambodia iti agdama nu sadino, kaadwan kadagitoy ket mangmangged kas mannursuro ken kadagiti daduma pay a serbisyo.
Idi laeng kalman ket nakadanon ti delegasyon ti Pilipinas idiay Cambodia nga indauloan ni President Marcos Jr.
Kabayatan ti kaadda dagitoy sadiay ket manamnama a mapirmaan dagiti katulagan iti nagbaetan ti Pilipinas ken Cambodia maipapan iti panangrisut iti transnational crime, higher education, ken air services.
Maysa metlaeng a kiddawen ti Pilipinas ti suporta para iti chairmanship daytoy iti 2026 Association of Southeast Asian Nations.
Kabayatanna, malaksid kenni First Lady Liza Araneta-Marcos, karaman iti delegasyon ni Migrant Workers Secretary Hans Leo Cacdac, Foreign Affairs Secretary Maria Theresa Lazaro, Trade and Industry Secretary Ma. Cristina Roque, Commission on Higher Education Chair Shirley Agrupis, ken Presidential Communications Office Secretary Dave Gomez.
