Napilaan ti reklamo ti maysa a lalaki nga agtawen ti 24 kalpasan ti panangilunod ken panangpangtana iti maysa a babai nga agtawen ti 32, agpada nga agnanaed idiay Dreamland, Pico, La Trinidad, Benguet.
Maibasar iti report ti La Trinidad Municipal Police Station, nakagteng ti biktima iti balayda idi nasabatna ti suspek nga addaan ti impluwensia ti arak.
Iti dayta a gundaway, naaddaanda ti argumento.
Inkagumaan ti biktima a pakalmaen ti kabsatna kagiddan ti panang-asistarna nga agturong iti kwartona ngem kellaat a nagpungtot ti suspek.
Ginandat ti suspek a dangran ti biktima babaen ti maysa a bote ti redhorse nga awan kargana.
Gapu iti dayta, limmaban met ti biktima, ngem naanawada babaen ti tulong ti ama dagitoy.
Bayat a naka-“hold” ti suspek, nangibalikas ti saan a nasayaat a pagsasao ken nagpangta pay daytoy a papatayenna dagitoy, a rason ti panagturongna iti opisina ti pulisya tapno agreklamo.
Iti agdama, ti kaso ket nairefer iti barangay dagitoy.//Bombo Noveh Organo
