Inlawlawag ti Police Regional Office-Cordillera ti rason iti panangirekep dagiti umili iti kalsada iti nagbaetan ti Talubin ken Barlig, Mountain Province itay laeng nabiit.
Iti panakiuman ti Bombo Radyo kenni PCapt. Clotheldee Pacuyan,Public Information Office ti Police Regional Office-Cordillera, kinunana nga inyakar dagiti taga-Barlig ti arko wenno ti boundary mark sadiay ngem insubli-da metlaeng daytoy.
Nupay kasta, nadadael daytoy a nangitunda iti saan a panagkikinaawatan dagiti constituents ti barangay Lingoy, Barlig ken Talubin, Bontoc, Mountain Province.
Sigun kenni PCapt. Pacuyan, inaladan ti constituents ti Talubin ti nasao a kalsada babaen iti landok ken sand/gravel iti 9:40 iti agsapa idi Setyembre 8, 2025 rason tapno awan ti pulos a makapagna sadiay pakairamanan dagiti pulis.
Iti report a naawat dagitoy manipud ti pulisya, awan met ti nadangran wenno nakaro a napasamak nga insidente kabayatan ti riri dagiti nadakamat a lugar.
Nupay kasta, gapu ti panagtutungtong dagiti maseknan nga umili kaduada ti governor ti Mountain Province ken dagiti municipal mayors ti dua a munisipyo, narisut ti riri dagitoy.
Gapu ti dayta, 4:40 ti malem idi Setyembre 9, 2025, napagdesisyon dan nga ikkaten ti naikabil iti kalsada .
Iti agdama, nasayaat metten ti kasasaad sadiay rason a mangnamnama ti kapulisan a saanen a maulit daytoy.
Maipalagip nga idi paylaeng napalplabas a tawen ket addan ti saan a panagkikinaawatan ti Talubin ken Barlig.//Bombo Noveh Organo
