Naituding a maisayangkat ti nagduduma a tignay-protesta wenno rally intun September 21 a partisiparan ti nagduduma a progresibo a grupo ken sektor tapno kondenarin ti nasaknap a korapsyon iti gobierno.
Ti anti-corruption rally ket maipatungpal idiay EDSA sadiay Metro Manila ken pasetan daytoy dagiti kangrunaan a siudad iti pagilian.
Ditoy lokalidad ket aktibo ti partisipasyon dagiti nagduduma a grupo a bukbuklen dagiti nagduduma a sektor partikular dagiti agtutubo.
Gapu iti daytoy ket immunan nga impeksa ti Philippine National Police ti kinasagana dagitoy tapno mangipaay iti assistance ken kontrol kadagiti mangisayangkat iti tignay protesta.
Karaman iti pagsagsaganaan ti PNP ti panagideploy wenno panagiwaras kadagiti personnel, panagikabil iti checkpoint ken border control, crowd management, reactionary standard support force ken traffic management.
Immunan nga impeksa ti Malacañang a bigbigbigen da ti karbengan ti tunggal maysa tapno ipeksa ken iruar ti marikrikna dagitoy kas nakalanad iti konstitusyon a Freedon of Expression.
Nupay kasta,nagballaag dagiti otoridad kontra kadagiti indibidual wenno grupo nga agala iti daytoy a gundaway tapno mangisayangkat iti destabilisasyon wenno riribok tapno madadael ti urnos ken kapia.
Kasapulan nga timbengen ken amiresen nga usto dagiti partisipante iti pakikapkappenganda a grupo tapno maamuan nu anya ti kangrunaan a tarigagay da iti rally wenno protesta tapno saan da a maisagmak nu adda ti mapasamak a saan a nasayaat.
Respetaren ken mangipakita kuma met iti nasayaat dagiti protesters wenno rallyist kadagiti otoridad tapno maliklikan a rumsua iti gulo ken maipatungpal ti tarigagay dagitoy a mangegan ti karirikna da iti natalna a wagas.//Bombo Jordan Tablac
