Insubli ni Francisco B. Echala, 32-anyos manipud La Trinidad, Benguet ti backpack a naglaon iti P100K a nabati ti pasaherona iti uneg ti imanmanehona a taxi idi Oktobre 21.
Iti pablaak ti Department of Transportation – Cordillera, inlugan ni Echala ti pasaherona manipud Partas Bus Station terminal, 9am agingga 10am idi Oktobre 21 ken nagdissaag idiay Newtown, Baguio City.
Kalpasan ti sumagmamano nga oras, nadiskobre ni Echala nga adda ti backpack a naglaon iti P100K cash a nabati iti uneg ti taxina.
Imbes nga idulinna daytoy, dagus nga inpanna ti nasao a bag iti opisina ti Land Transportation and Franchising and Regulatory Board -Cordillera idiay Pacdal, Baguio City, 12pm.
Saan a naan-ano ken saan a naksayan ti nilaon ti nasao a bag idi naisubli daytoy iti agtagikua.
Impeksa met ti nasao nga ahensiya nga idadauloan ni Regional Director Retired General Glenn G. Dumlao ken Assistant Regional Director Atty. Jose V. Villacorta ti panangdayawda iti kinapudno ken kinasayaat nga impakita ni Echala.
Ni Echala ket agserbi kas pagwadan para kadagiti driver a mangipapaay serbisyo kadagiti commuter.
