Dumanon iti agarup 1,500 nga estudyante iti Saint Louis University iti Baguio City ti nakipaset iti naangay a walk out itay malem.
Ti nasao a walkout ket pinasetan dagiti agarup 39 nga organizations ti nasao a pagadalan no sadino nangrugi daytoy iti ala una iti malem ken nagleppas iti pasado alas dos iti malem.
Iti panakiuman ti Bombo Radyo kenni Zieg Soliman, maysa kadagiti leaders ti democratic alliance of students for integrated governance (dasig) kinunana a ti ilablaban dagitoy ket ti panakaisardeng ti korapsyon gapu ta saan laeng a maipapan daytoy iti kwarta no diket karaman metlaeng ti masakbayan dagiti estudyante.
Kinunana pay a no idi paylaeng a napasardeng ti korapsyon ket saan kuman nga agsagsagaba dagiti Pilipino.
Impettengna pay nga arigna a domino effect daytoy gapu ta kanayon a maidaddadanes dagiti adda iti nababa a sektor.
Kabayatanna, impeksa met ni Romano Bulatao, Assistant Director iti Office of the Student Affairs and Services a ti nasao a walk out ket saan a nasayaat a naikoordinar daytoy kadakuada.
Nupay kasta, ti seguridad dagiti estudyante ti binantayan dagitoy bayat ti panakaipatungpal ti nasao nga aktibidad.
Mainaig iti dayta, insingasing daytoy a katungtungen dagiti officers dagiti estudyante tapno mapagtutungtungan daytoy nangruna ti proseso ti panakaipatungpal daytoy.
Innayonna pay a daytoy ket delikado ken nangitunda iti trapiko iti kalsada ken ti panakasinga ti klase dagitoy.//Bombo Noveh Organo
