Impetteng ni Department of Public Works and Highways (DPWH) Secretary Vince Dizon a manarimaanen ti dismissal proceedings kontra kenni Baguio City District Engineer Rene Zarate.
Daytoy ket kalpasan iti panagtamperna kadagiti dokumento nga agserbi kuma kas ebidensya kadagiti naanomalyaan nga infrastructure projects iti siudad ti Baguio.
Maipalagip a dagus a nangipila ni Dizon iti administrative case kontra kenni Zarate, no sadino naipaayan daytoy iti 90 nga aldaw a preventive suspension order.
Sigun kenni Mayor Benjamin Magalong, nakaawat daytoy iti impormasyon maipapan iti panangpadas ni Zarate a mang-falsify kadagiti dokumento mainaig iti mountainside road project iti siudad.
Kapada metlaeng daytoy ti proyekto nga impakita ni Mayor Magalong kenni President Ferdinand Marcos Jr. bayat ti panagbisitana iti siudad idi napalabas a bulan.
Kinuna ni Mayor Magalong, a suksukatanda dagiti mismo a dokumento tapno isingpa daytoy tapno saan nga agbalin a fraud wenno maamuan nga addaan iti parikut ti nasao a proyekto.
Impettengna pay a saan a daytoy ti umuna a gundaway a nairaman ti Zarate kadagiti iregularidad.
Kabayatanna, innayon pay ni Dizon nga impatulodna ni incoming DPWH Undersecretary Arthur Bisnar iti siudad ti Baguio tapno mangipatungpal iti naun-uneg pay nga imbestigasyon seknan iti nasao a banag tapno maipasigurado nga amin a napapateg a dokumento ken devices ket masecured.
