Impakaammo ti Bureau of Customs a mapatpatta a P100 million a taxes ti maatap a nabatbati pay a saan a nabayadan dagiti agasawa a da Curlee ken Sarah Discaya kadagiti 13 manipud iti 30 a luxury vehicles dagitoy.
Maibasar iti report ti Rolls-Royce Cullinan dagitoy ket aggatad iti P22 million bayat a P33 million a taxes ti rumbeng a mabayadan para iti acquisition daytoy.
Nupay kasta, awanan daytoy iti permit wenno certificate of payment iti taxes a maipresenta para iti nasao a lugan.
Gapu iti dayta, impakaammo ni Bureau of Customs Commissioner Ariel Nepomuceno a nangipaay dagitoy iti Warrant of Seizure and Detention (WSD) kadagiti nasao a lugan.
Sigun kenkuana daytoy ti pormal a proseso no sadino no saanda a mapaneknekan a kukuada dagitoy ket maforfeit wenno maipa-auction.
Dagiti nasao a lugan ket addan iti kustodiya ti Bureau of Customs.
Paset metlaeng daytoy ti agtultuloy nga imbestigasyon ti Senate Blue Ribbon Committee seknan kadagiti naanomalyaan a flood control projects iti Pilipinas.
