BAGUIO CITY – Inkeddeng ti pamilia daydi Jarren Dabaras a saanen a maipasidong iti Autopsy ti bangkay daytoy.
Iti interview ti Bombo Radyo kenni Police Major Carlos Puguan, Jr., Chief of Police ti Baguio City Police Office Station 4, kinunana a nagsagrap ti biktima ti sumagmamano nga injuries gapu iti panagpagpagna daytoy.
Maibasar pay iti impormasion manipud iti Doktor, nakapasar daydi Jarren ti Dehydration, pneumonia ken komplikasion a nangitunda iti ipupusayna.
Maipalagip nga immuna a naireport a mapukpukaw ti nasao a biktima idi september 29, pasado alas kwatro ti agsapa.
Agtawen daytoy iti innem, masya nga Autistic ken residente iti Barangay Middle Atok Trail, Baguio City.
Nasarakan daytoy idi October 2, kalpasan ti agarup tallo agingga uppat nga aldaw a panangbirbirok dagiti Pulis, Barangay officials, kaaruba dagitoy ken dadduma pay a maseknan.
Nasarakan daytoy iti creek ti paset paylaeng ti Atok trail, agarup 100 meters ti kaadayo manipud iti balay dagitoy.
Iti baet dayta, pimmusay metlaeng daytoy idi October 03, 2025.
Iti pannakiuman paylaeng ti Bombo Radyo iti ina ti biktima a ni Jeanet Dabaras, naamuanda a mapukkaw ni Jarren iti pasado 4:00 AM ken nadiskobreda a nakalukat ti back door ti balayda.
Gapu iti dayta, naisayangkat ti search and rescue operation iti Central Business District ken iti Atok trail agingga a nasarakan daytoy.
Kabayatanna, masmasdaaw ni Police Major Puguan Jr. no kasano a nakadanun daydi Jarren iti lokasion a nakasarakanda kenkuana.
Impetteng daytoy a nadanunda ti lugar ken nagaramatda iti megaphone kabayatan ti search and rescue operation ngem saanda latta a nasarakan.
Iti baet dayta, agyamyaman daytoy ta nasarakan sakbay ti bagyo.
Impeksa met ti ina ti biktima ti panagyamanna kadagiti amin a timmulong iti pannakabirok ti nasao nga ubing.
Saan metten dagitoy nga umanamong iti pannakaisayangkat ti kanayunan nga imbestigasion ken ipasa-Dios da lattan, no adda man ti napasamak a foul play.
Kabayatanna, nangipaay metten ti City Social Welfare and Development Office (CSWDO) iti tulong kadagitoy.//Bombo Noveh Organo
