Pimmusay ni Patrolman Christian Paul Gumowang Bolicday, agtawen iti 25 ken kameng iti Police Regional Office-Cordillera gapu iti septic shock idi October 04, 2025.
Ni Bolicday ket tubo sadiay Tabuk City, Kalinga no sadino naidestino daytoy idi Setyembre 2025 iti unit ti Regional Personnel Holding and Accounting Section (RPHAS) iti Police Regional Office-Cordillera.
Immunan a nagserbi daytoy kas kameng ti Regional Mobile Force Batallion sadiay Tabuk City, Kalinga.
Nupay kasta, pimmusay daytoy idi parbangon idi Octobre 4 iti Cordillera of the Divine Grace (CHDG) sadiay Wangal, La Trinidad, Benguet.
Maibasar iti report ken imbestigasyon ti La Trinidad Municipal Police Station, ti nasao a pulis ket nadiagnos iti acute kidney failure (stage 4 cancer) idi Agosto 18, 2025.
Iti panakiuman ti Bombo Radyo iti kabatch daytoy, arigna a kellat ti sakit a nadiognose kenkuana.
Innayonna metlaeng a nagkallaysa laeng dagitoy iti asawana idi napalabas a tawen.
Gapu iti dayta, maladingitan dagitoy iti nasapa nga ipupusay ni Bolicday.
Kagiddan dayta, inyebkas metlaeng ti sibubukel a kameng ti nagduduma a unit ti pulis iti rehion Cordillera ti panakipagriknada kadagiti napanawan a pamilya ken asawa ti nasao a pulis.
Naiyawid metten ti bangkay daytoy sadiay Tabuk City, Kalinga.//Bombo Noveh Organo
