Timmabuno ni Leyte Rep. Martin Romualdez, ti sigud a House Speaker, iti umuna a gundaway ita nga aldaw iti panagdenggeg ti Independent Commission for Infrastructure (ICI), a nadutukan a mangimbestigar iti korapsion ti flood control projects.
Nakadanon ni Romualdez iti alas-10 ti agsapa.
Iti maysa nga ambush interview, kinunana a nakasagana daytoy a mangipaay ti personal nga ammona iti proseso ti pondo kas sigud nga Speaker ken kameng ti Bicameral Conference Committee.
“Nagpapasalamat ako sa ICI sa imbitasyon, I am ready to give my personal knowledge on the budget process, and while a member of the Bicameral Conference Committee, I will share any information to help determine the truth and to give all the facts and information to help in any way to speed up the resolution of the fact finding investigation of the ICI.”
Leyte Rep. Martin Romualdez
Ni Romualdez ti maysa kadagiti nadakamat a mapapati a nakaawat ti kickback kadagiti lood control projects, kaduana ni sigud nga Ako Bicol Rep. Zaldy Co, ti mapapati a mastermind.
Ni Co, a naimbitaran idi napalabas a panagdenggeg ti ICI ket saan pay a nagparang.
Maipalagip nga idi napalabas a lawas, impakaamo ti ICI a manamnama nga agtestigo ni Romualdez seknan iti national budget insertions ken ti posible a pannakairamanna iti DPWH flood control projects idi House Speaker paylaeng daytoy.
