Naituding nga agturong ni Ukrainian President Volodymyr Zelensky idiay Estados Unidos ita a lawas tapno makipagkita kenni United States president Donald Trump.
Manamnama a talantanenda ti maipapan iti air defence ken nu kasano a maipaayan iti kanayonan pay a pressure ti Russia.
Kinumpirmar metlaeng ni Trump ti panagtaripnongda kenni Zelensky a maikatlo itan a gundaway a sangailiyenna idiay White House sipud Enero.
Sigun kenni Zelensky, napagsaritaanda kenni Trump babaen iti awag iti telepono dagiti karit a sangsangwen iti Ukraine manipod iti panagatake iti Russia.
Kadwa ni Zelensky iti nasao a taripnong dagiti daduma pay nga opisyales iti Ukraine kas kenni Prime Minister Yulia Svyrydenko, ken dagiti dadaulo iti presidential office, national security council, ken daduma pay a diplomatic representatives.
