Pimmusay ti lima bayat a nadangran ti 21 nga indibidual kalpasan a bimtak ti bomba nga iggem ti maysa a babae sadiay Moscow, Russia idi Sabado, Agosto 1,2026.
Napasamak ti insidente iti uneng ti maysa nga Italian restaurant, sakbay ti 8:00 p.m iti nasao nga aldaw.
Sigun iti National Anti-Terrorism Committee (NAK) ti Russia, iggem ti saan a nabigbig a babae ti improvised explosive device ken pinadasna a sumrek iti restaurant.
Nupay kasta, nilapdan ti maysa a security guard.
Innayon ti ahensiya a namimpinsan a pimmusay ti babae, guardiya ken maysa a kustomer ti restaurant kalpasan ti panagbettak ti bomba.
Saan paylaeng a kompermado ti espekulasion a posible nga adda ti pakainaigan ti insidente iti giera ti Russia ken Ukraine.
Kabayatanna, inkari ni Moscow Mayor Sergei Sobyanin a madusa ti siasinoman a responsable iti inawaganna a brutal a “terrorist attack”.
