Nakasaganan ti Department of Transportation (DOTr) iti manamnama a panagngato ti bilang dagiti agbiahe a pasahero ken motorista para iti umadanin nga All Souls’ Day ken All Saints’ Day.
Pakairamanan daytoy dagiti kameng iti Land Transportation Office (LTO), Land Transportation Franchising and Regulatory Board (LTFRB), Philippine Coast Guard (PCG), kasta metten dagiti daduma pay a government units.
Sigun kenni DOTr Acting Secretary Giovanni Lopez, all set itan ti nasao nga ahensya ken kinunana a mangipaay ti operator iti South Luzon Expressway (SLEX) iti agingga lima a litro iti libre a gasolina kadagiti motorista a posible a maibusan iti gas kabayatan ti panagbiaheda.
Impanamnama ti opisyal a mangideploy ti nasao nga expressway operator iti fuel trucks a mabalin a pangnamnamaan dagiti stranded a motorista.
Daytoy ket sigun iti panakipagsaritana kenni Ramon Ang,ti chairman ken CEO iti San Miguel Corporation (SMC) nga operator iti SLEX.
Malaksid iti dayta, nakikoordinaren ni Lopez iti Philippine Drug Enforcement Agency (PDEA) para iti panakaipatungpal iti drug testing kadagiti driver dagiti parapubliko a transportasyon nagruna dagiti agbiahe iti adayo wenno long-distance.
