Impakaammo ti National Bureau of Investigation (NBI) nga “octopus wiring” wenno overloaded electrical connections ti posible a rason iti napasamak nga uram iti Department of Public Works and Highways’ (DPWH) Bureau of Research and Standards office sadiay Quezon City idi October 22, 2025.
Sigun kenni NBI Director Jaime Santiago, naduktalan dagiti imbestigador dagiti sumagmamano nga ebidensia ti hazardous, saan nga umno a pannakaaramat ti extension cords ken electrical cables iti nasao a lugar.
Nupay kasta, kinuna ni Santiago a saan pay a nailaksid ti posibilidad a naigagara ti napasamak nga uram bayat nga agtultuloy ti imbestigasion.
Kabayatanna, nangipatulod ti NBI ti forensic chemists a mangsukimat iti napasamakan ti uram para iti posible a pannakasapol ti flammable substances.
Maipatpatungpal metlaeng ti nagtipon nga inpeksion ti Bureau of Fire Protection (BFP) tapno maamuan no ti uram ket gapu iti panangbaybay-an wenno aksidente.
