Idagdagadag dagiti biktima iti drug war ni sigud a president Rodrigo Duterte ti panangipatungpal iti International Criminal Court (ICC) iti panagdengngeg iti kaso a crimes against humanity a sangsangwen ti sigud a presidente.
Sigun kenni Atty.Neri Colmenares, co-counsel dagiti pamilya dagiti maatap a napapatay iti extrajudicial killing, nasayaat a nalawag itan nga addaan iti jurisdiction ti nasao nga international tribunal iti kaso ni Duterte.
Kagiddan dayta, kidkiddawen metlaeng ni Colmenares kenni Duterte a sardenganna a mangaramid iti delaying tactics a mangitantan iti proceedings iti ICC.
Innayonna a nabayagen nga ipukpukkaw ti pamilya dagiti biktima ti hustisya a patienna a saan nga impaay kadakuada ti sigud a presidente.
Mainaig iti dayta, karaman pay a kiniddaw ti nasao nga abogado ti panakaipaiyulog iti warrant of arrest kontra kenni Senator Ronald “Bato” dela Rosa a nagserbi kas dadaulo iti Philippine National Police (PNP) kabayatan ti administrasyon ni Duterte.
Nupay kasta, immunan a nailawlawag a saan a kaskarina a maarestar ni dela Rosa gapu kadagiti sumagmamano a factors kas iti agdama a panagserbi daytoy kas senador.
