Impakaammo ti National Center for Mental Health crisis hotline a nakaawatda ti 7,189 a bilang dagiti suicide-related calls manipud Enero agingga Setiembre 2025.
Maibasar iti datos ti nasao nga ahensia, nakaawat ti center for wellness and crisis hotline ti 1,037 nga awag idi Agusto 1, bayat a 1,036 idi Setiembre ken 1,002 idi Hunio.
Sigun iti National Center for Mental Health crisis hotline, bulan ti Agusto, Setiembre ken Hunio iti agdama a tawen ti Top 3 a bulan a kangrunaan a nakaawatda ti suicide-related calls.
Iti nasao a datos, 32.95 percent iti 21,815 a pakabuklan a bilang ti awag ket manipud kadagiti distressed nga indibidual.
Sigun pay iti NCMH, anxiety ken depressive symptoms ti kangrunaan a rason dagiti immawag kadakuada, sinaruno ti love ken relationships issues, problema iti pamilia, maikappat dagiti akidkiddaw ti referrals ken maika-lima dagiti agkasapulan ti makasarita.
Maipalagip a naiyuswat ti wellness and crisis hotline idi 2019 no sadino, dumanon iti 115,618 nga awag ti naawat dagitoy.
Kaaduan kadagiti indibidual nga immawag kadakuada ket dagiti agtawen ti 18 agingga 30 manipud iti National Capital Region, Calabarzon ken Central Luzon.
Iti kanito nga agkasapulan ti suporta, kidkiddawen ti NCMH a saan nga agduadua nga awagan ti crisis hotline dagitoy iti landline number a 1553 wenno mobile numbers 0919-057-1553 para iti Smart/TNT ken 0917-899-8727 iti Globe/TM.
