Dumanon itan iti 55 dagiti pimmusay gapu iti nagpisa a tudo, layus ken panagreggaay ti daga nga intunda ti bagyo sadiay Central Vietnam.
Malaksid iti dayta, mapukpukaw paylaeng dagiti 13 nga indibidual sigun iti disaster agency iti nasao a pagilian.
Kabayatanna, dumanon iti 1,900 mm ti tudo kadagiti sumagmamano a paset ti central Vietnam idi napalpalabas a lawas.
Maibasar iti kaudian a datos, kaadduan kadagiti pimmusay ket manipud sadiay Dak Lak no sadino, dumanon iti 27 bayat a 14 dagiti pimmusay sadiay Khanh Hoa.
Mainaig iti dayta, dumanon iti agarup 8.98 Trillion Dong wenno katukadna ti $341 Million ti gatad dagiti nadadael gapu iti layus.
Dumanon met iti agarup 235,000 a babbalay ti nalayus bayat nga 80,000 nga ektaria a mula dagiti nadadael.
