Nakaawiden dagiti coach ken atleta a nangibagi iti Pilipinas iti ONE Friday Fights 134 a naangay idiay Lumpinee Stadium, Bangkok Thailand idi November 21, 2025.
Iti nasao a pasalip ket nagballigi ti Cordilleran fighter a ni Islay Erika Bomogao kontra iti Thai a ni Ploychompoo PU Phabai nakabalubalna iti Muay Thai babaen iti knockout.
Iti panakiuman iti Bombo Radyo kenni Edzel Ngina, ti coach ni Islay ken kameng iti Philippine National Muay Thai team, nagtultuloy ti panakibalubal ti nasao nga atleta sipud nangrugi daytoy idi Nov 8, 2024 iti ONE Friday Fights 86.
Sigun kenni Ngina, ti laeng gundaway a makainana ni Islay ket nu awan iti labanna.
Kagiddan ti panaginana daytoy ket agtultuloy latta ti panagensayo ken panagadalna kadagiti banbanag a nakitada a nagkurangan daytoy iti napalabas nga ay-ayamna.
Maysa kadagiti nadakamatna a puntiryada iti tunggal laban ti pananggundaway iti mabalin a panangknockout iti kalaban — banag a naiyaplikar ni Islay iti kaudian a laban daytoy.
Mainaig iti dayta, naragsak nga imbinglay ti nasao a coach a saan laeng a dagiti Pilipino ti mangipakpakita iti suporta kenni Islay nu di ket adda metlaeng dagiti fans daytoy a Thai.
Iti agdama, puntirya dagitoy a makisalip iti Championship ngem inlawlawag ti coach nga awaten ken sangwenda latta ti anyaman nga ipaay iti promotion para iti sumaruno a laban ni Islay.//Bombo Rob Dominguez
