Nakaro a naapektaran ti pagbiagan dagiti mannalon, nangruna iti Baguio ken Benguet, gapu iti agsasaruno a pannakalugi dagitoy.
Sigun kenni Godfrey Sapdit, Agriculturist II iti Baguio City Veterinary and Agriculture Office, maysa kadagiti rason ti pannakalugi dagiti mannalon ket ti epekto ti nagdalan a habagat ken bagyo, kasta metten ti isyu maipapan kadagiti maatap nga smuggled products ita a panawen.
Sigun pay kenkuana, maysa a karit para kadagiti lokal a mannalon ti nababa a presyo dagiti maatap a smuggled products no idilig kadagiti lokal a produkto dagiti mannalon, isu’t gapunna a narigat para kadakuada ti makipagkompetensya iti merkado.
Gapu iti daytoy, ar-aramiden ti ahensya ti kabaelanda tapno makatulong kadagiti mannalon babaen iti panangipaay kadagiti tulong kas kadagiti libre a bukel, fertilizer ken dadduma pay a suplay.
Mangisaysayangkat metlaeng ti ahensya kadagiti training maipapan iti good agricultural practices tapno maadal dagiti mannalon dagiti nasayaat ken epektibo a wagas iti panagmula ken panangtaripato kadagitoy.
Kabayatanna, namnamaen a babaen kadagitoy a programa, mapasayaat ti kalidad dagiti lokal a produkto ken matulongan dagiti mannalon a mangsalaknib iti pagbiaganda iti laksid dagiti karit iti sektor ti agrikultura.
Napateg metlaeng ti panangsuporta dagiti konsyumer kadagiti lokal a produkto tapno matulongan ti pagbiyagan dagiti mannalon ken mapapigsa ti lokal nga industriya ti agrikultura.
Kabayatanna, impaganetget met ti opisyal ti kinatapateg ti pannakitinnulong dagiti mannalon ken dagiti ahensya ti gobierno tapno nasaysayaat a masolbar dagiti problema iti panagmula ken panaglako dagiti apitda.
Impalagipna metlaeng kadagiti konsyumer nga adadda kuma pilienda dagiti lokal a produkto tapno saan laeng a matulongan dagiti mannalon, no di ket mapabileg pay ti ekonomiya dagiti komunidad ditoy Baguio ken Benguet.//via Bombo Khey Reparip
