Naduktalan a cardiac arrest ti rason iti ipupusay ti agtawen iti 49 a lalaki a nasarakan iti abay ti maysa a simbaan sadiay Aurora Hill, Baguio City.
Maibasar iti imbestigasyon ti kapulisan, maysa a security guard ken retired engineer ti nakakita iti nasao a biktima nga awanan iti poot iti nadakamat a lugar.
Gapu iti dayta, dagusda nga immawagda ti station ti kapulisan tapnu ireport daytoy.
Ditoy met a nakita dagiti otoridad ti biktima a nakasanggir ken nakatugaw iti planter box iti simbaan nga awanan poot.
Naikoordinar met daytoy a dagos iti Baguio City Emergency Medical Service( BCEMS) no sadino ket indeklara dagitoy a ti ipupusay ti biktima ket cardiac arrest.
Mainaig ti dayta, dimteng metlaeng ti Baguio City Forensic Unit no sadino maibasar iti ocular inspection dagitoy nasarakan ti maysa a bote ti 2×2 nga awanan ti karga iti flower pot nga asideg laeng ti biktima a pimmusay.
Maibasar met iti kabsat ti biktima, imbutaktakna nga adict iti arak ti kabsatna.
Malaksid iti dayta, impeksa ti kabsat ti biktima nga iti malem ti Nobyembre 26,2025 naturog ti biktima iti balayna a nabarbartek, maul-ulaw ken agbakbakwar.
Iti agdama ti bangkay ti biktima ket saanen a naipasidong ti autopsy kalpasan a kumbinsido ti pamilya ti biktima nga awan ti foul play.//Bombo Noveh Organo
