Dumanon itan iti agarup 600 a tattao ti pimmusay gapu iti layus ken panagreggaay ti daga nga intunda ti bagyo kadagiti tallo a pagilian iti Southeast Asia.
Maibasar iti report, kangrunaan a naapektaran ti Indonesia, Malaysia ken Thailand gapu iti napigsa a panagbayakabak ti tudo ken napigsa nga angin.
Sigun kadagiti maseknan nga otoridad, 435 ti pimmusay sadiay Indonesia, 170 sadiay Thailand ken tallo sadiay Malaysia.
Mainaig iti dayta, agarup 10,000 a tattao kadagiti tallo a pagilian ti naibakwit bayat nga agarop 3 Million dagiti naapektaran iti southern Thailand ken agarup 1.1 Million iti western Indonesia.
Kabayatanna, kinompirmar ti Department of Foreign Affairs (DFA) a dumanon iti agarup 242 a Filipinos ti naapektaran iti bagyo a dimmalapos kadagiti nasao a pagilian.
