Kagiddan ti panakaipatungpal ti kick off motorcade iti Bureau of Fire Protection-Baguio para iti Oplan Iwas Paputok 2025, naipalagip iti publiko ti nakalanad iti Resolution No. 15, Series of 2025 nga impaiyulog iti City Peace and Order Council (CPOC) a pinirmaan ni Baguio City Mayor Benjamin Magalong idi laeng bulan ti Mayo.
Iti bileg ti nasao a resolusyon ket maiparit ti individual, personal, wenno household use iti firecrackers ken daduma pay a klase iti paputok.
Mapalubusan laeng ti panakaaramat dagitoy iti community fireworks displays ngem kasapulan a dumalan metlaeng iti proseso pakairamanan iti panagala iti permit ken authorizations maitunos iti amin a safety standards.
Iti panakiuman iti Bombo Radyo kenni Fire Superintendent Mark Anthony Dangatan, fire marshal iti BFP-Baguio, kinunana a ti panakaiyuswat iti Oplan Iwas Paputok 2025 ket para iti public safety nangruna ita a Yuletide season—panawen a saan a kadawyanen a maar-aramat dagiti paputok.
Inlawlawag ni Dangatan a dagiti pyrotechnic devices a kas iti sparklers, fountains ken luces ket mabalin latta a maaramat ngem kadagiti laeng aprubado a community fireworks displays ken parapubliko a pasken.
Nupay kasta, kasapulan latta a mangala dagiti organizer kadagiti kaskenan a permit tapno masigurado ti panagtulnog dagitoy kadagiti safety measures.
Kasapulan met a maikonsulta iti Philippine National Police(PNP), Bureau of Fire Protection wenno Baguio City Fire Stations, ken iti lokal a gobyerno dagiti listaan ti naituding a fireworks zone tapno masigurado ti kinatalged iti panagaramat kadagitoy.
Kabayatanna, dagiti met paputok a maiparit a mailako ken maaramat ket sigun iti kapulisan ket pakairamanan iti super lolo, lolo thunder, atomic bomb ken daduma pay a narisgu a klase iti paputok.//Bombo Noveh Organo
