Naituding a mangipatungpal ti transport group a MANIBELA iti transport strike inton Decemebr 9 agingga December 11 wenno tallo nga aldaw a tigil-pasada.
Sigun kenni MANIBELA Chairperson Mar Valbuena, ti nasao a tignay-protesta ket para iti nabuntog a tignay iti gobyerno iti panangiproseso kadagiti dokumento.
Sigun kenni Valbuena, agtultuloy nga ibagbaga dagiti otoridad a mangala iti provisional authorities dagiti driver ken operator dagiti unconsolidated public utility vehicles (PUV).
Maipalagip a ti consolidation ket ti umuna nga addang iti maisaksakad a Public Transport Modernization Program (PTMP) nga addaan panggep a mangsukat kadagiti tradisyunal jeep kadagiti Euro 4-compliant engine tapno maksayan ti polusyon.
Nupay kasta,ti tunggal yunit iti moderno a jeep ket agbalor iti nasurok two-million pesos, gatad nga uray iti LandBank ken ti Development Bank of the Philippines ket ibilang da a nangina.
Malaksid iti dayta, maysa metlaeng a manamnama a madakamat iti protesta ti maatap a panakaitantan iti panakairehistro dagiti daduma a lugan.
