Impetteng ni Ombudsman Jesus Crispin Remulla nga adda ti arrest warrant kontra kenni Senator Ronald “Bato” dela Rosa nga impaulog ti International Criminal Court (ICC).
Nupay kasta, saan paylaeng a pormal a maimplementar daytoy.
Maipalagip a saanen a nagparparang ni dela Rosa kalpasan nga impakaammo ni Remulla a nakaawat daytoy iti kopya ti “unofficial” ICC arrest warrant kontra iti Senador idi Nobiembre 11, 2025.
Sigun kenni Remulla, adda paylaeng iti pagilian ti Senador, paritikular sadiay Pampanga.
Kabayatanna, inlawlawag ti Department of Justice (DOJ) nga awan paylaeng ti naawat ti Philippine government a kiddaw ti Interpol a maarestar ni dela Rosa.
Nupay kasta, maipatungpal daytoy a dagus iti kanito nga adda ti pammilin a maawat dagitoy manipud iti Interpol.
Nagserbi kas Chief ti Philippine National Police (PNP) ni dela Rosa kabayatan ti pannakaipatungpal ti deadly war on drugs nga imimbestigaran ti ICC gapu iti maatap a crimes against humanity.
