Tinubngar dagiti abogado dagiti biktima iti drug war ti baro a pagalagadan iti International Criminal Court (ICC) iti panangammo nu siasino ti mabalin a makipaset iti panagtingiting kontra kenni sigud a President Rodrigo Duterte.
Kiniddawda iti ICC a pagtalinaeden ti karbengan dagiti immuna a nabigbig a biktima ken ipanamnama ti patas iti panagsukimat kadagiti baro nga aplikante.
Sigun kadakuada, posible a mapukaw ti panangbigbig ken karbengan a makipaset ti sumagmamano a biktima gapu iti baro a pagalagadan.
Kabayatanna, sinuportaranda metlaeng ti panagaramat iti testimonia iti sigud a pulis idiay Davao City a maibagbaga a kameng iti Davao Death Squad (DDS), a mabalin a makatulong iti panagtingiting.
Sumangsango ni Duterte iti tallo a bilang iti crime against humanity iti ICC, a naituding a mangrugi inton Nobiembre 30.










