Mabalballaagan dagiti turista wenno motorista ken kadagiti amin a magmagna sadiay Kennon Road a liklikan nga agpapapicture sadiay, nangruna kadagiti narisgo a derraas tapno maliklikan ti aniaman nga aksidente.
Daytoy ket gaputa adu dagiti agpapapicture iti igid ti kalsada partikular iti lugar a nakapasamakan ti insidente kalpasan a naipakaammo ti ipupusay ni sigud a Department of Public Works and Highways Undersecretary Maria Catalina Cabral iti nasao a lugar.
Iti pannakiuman ti Bombo Radyo ka da kagawad Leonille Lampac ken Janet Ticagan iti Barangay Camp 4, Tuba, Benguet, kinunana da a nangikabil metten dagitoy iti pakdaar nga awan ti agpapicture wenno bumaba iti nasao a kalsada.
Malaksid iti dayta, nakikoordinar metten dagitoy kadagiti kameng ti pulisya tapno agroving iti nasao a lugar.
Kinunada pay nga adda dagiti maideploy a brgy. tanod sadiay a mangkita ken mangpapanaw kadagiti agsardeng sadiay.
Gapu iti dayta, inyunay-unayda a igun saan a tourist destination ti Kennon Road, rason a rumbeng a liklikan nga agtambay iti igid ti kalsada.
Naiyunay-unay metlaeng a maipawil ti panangpapicture tapno maliklikan ti aniaman nga insidente.
Impetteng ti maysa a biker a nagsardeng daytoy sadiay Kennon Road gaputa nacurious laeng daytoy ken kayatna a kitaen ti nakapasamakan ti insidente kalpasan a naipadamag ti ipupusay ni sigud a Department of Public Works and Highways Undersecretary Maria Catalina Cabral.
Iti pannakiuman ti Bombo Radyo kenkuana, kinunana nga iti kabayagna a magmagna sadiay kas biker ket awan ti nadlaw wenno nakitana a nagtugaw wenno nagtambay sadiay.
Kagiddan dayta, impetteng dagiti opisyal ti Barangay Camp 4, Tuba, Benguet nga adda man dagiti napalabas a natnatnag sadiay Kennon Road ngem kadaywan a gapu iti vehicular traffic accident.
Sigun ka da kagawad Leonille Lampac ken Janet Ticagan iti Barangay Camp 4, Tuba, Benguet ita laeng nga adda ti natnag a tao sadiay a nagviral gapu ta maysa dagitoy a central figure.
Mamati met dagitoy nga ita laeng nga arigna a mapagbalbalin a tourist site ti nasao a kalsada gapu ta fresh paylaeng ti napasamak.
Nagpalagip manen daytoy dagitoy iti publiko a saan a tourist site ti nasao a lugar.//Bombo Noveh Organo
